雞記潮州麵食

營業中

休息中

今日去尖沙咀剪頭髮，去之前上OpenRice睇吓附近有咩好食，見到呢間潮州麵店好有興趣，就決定去試。喺門口等位嘅時候見到餐牌，一個單餸麵已經加到$60，絕對唔平，但一場嚟到決定照入去試吓。一坐低望到餐牌$62？！咁都算，我坐低嗰陣大約12:15pm左右，好快就決定叫一碗紫菜墨丸米，個職員問我要炸定唔炸嗰隻，我話唔炸，佢話賣晒。但之後佢又改口話唔夠，同你加幾粒白色嘅落去囉。我話如果賣晒我叫其他嘢，佢問廚房，個師傅好大聲咁話有。我問佢咁炸嘅呢？佢好似唔肯俾我轉其他嘢咁係都話有。就係咁照落單。結果嚟咗碗全白色嘅墨丸米。我擰轉面問個職員一粒都冇呀？佢答我尋日犀利呀嘛！我：？？佢話尋日犀利，賣晒！我嗰一刻又嬲又無奈。你賣晒唔係問題。問題係我問你係唔係賣晒，係我就轉其他嘢，你好肯定咁答我有！係咪覺得自己出名就可以咁樣對消費者？結果$62我食咗一碗平平無奇，得四粒墨丸嘅墨丸米。你可以話佢包一碟油菜或熱飲，但都絕對唔值呢個價。