老二花廳 (已結業)

同好姊妹聚會，揀咗一間好有特色啲嘅餐廳，上網見到啲相比佢吸引左去。去到覺得裝修好特別，好有懷舊感，壁畫又好得意，岩哂同閨蜜們去影下靚相，食下野，傾下計～食物嘅種類都幾多，飽肚嘅又有，小食又有，甜品又有，花茶咖啡奶茶都有，任君選擇。我哋就叫咗一個闊條麵，三份小食。係等緊嘢食嘅時候，發現到除咗裝修特別之外佢嘅餐具都非常之特別，真係勁有懷舊感，好似回到過去一樣！食物嘅質素都幾有水準，闊條麵一上枱就聞到陣陣香味，令人流晒口水，味道都好好。其他小食嘅份量都好多，黑松露薯條除咗有醬點之外上面都淋左啲黑松露醬，令到黑松露味更有層次。小食拼盤嘅雞翼都好香口，幾好味。鹹窩夫就比較有特色，再飲埋杯嘢飲真係好飽。最後原來朋友準備咗生日蛋糕同我慶祝(切餅費$50)，好開心可以喺呢度影咗好多靚相，店員都好好人幫忙影合照，過咗個好開心嘅下午。有啲朋友見到啲相之後都問我去咗邊度食嘢，整體來講我都幾鍾意呢間餐廳，所以會再推介比朋友。