大壹冰室 (已結業)

9點幾係荃灣廣場睇完戲，諗住係商場搵野食，點知每一間餐廳都要等位，仲要好多人等，唯有行出去商場附近嘅餐廳啦，見到間叫大壹冰室，望一望餐廳裡面，裝修幾懷舊，幾靚，所以就入左去食。叫咗個意大利芝士焗鮮茄豬扒飯，先上個餐湯，雜菜湯，味道酸酸甜甜，又夠熱，配埋蒜蓉飽，都幾好飲，跟住焗豬扒飯都到咗，個樣ok，豬扒都夠淋，又大件，味道唔錯。烤A級榖飼西冷配黑松露野箘汁跟薯菜，不過店員話今天薯條冇貨，可以只要蔬菜，ok都無乜所謂，清清地仲好，牛扒叫咗七成熟，但係我諗佢過咗火，差唔多全熟，牛扒本身已經薄切，全熟後好乾好硬，野菌汁好淡，有少少黑松露味，全碟最好都係d蔬菜，用蒜蓉去炒嘅四季豆，茄子，紅蘿蔔，清清地，好快比我食晒，而牛扒因為唔想浪費，所以都食晒。餐飲凍檸茶，都有茶味，又唔太甜。老實講，下次如再去嘅話，都係食焗飯穩陣，牛扒要諗諗先。