Loop Kulture

營業中

休息中

Loop Kulture✖️呢度係一間有裸賣嘅Cafe，除咗食物之外，仲有蠟燭、止汗劑、香體膏、潤唇膏、香水、香薰及有機護膚品出售。地方空間都夠大，枱與枱之間唔會覺得好逼夾。樓高兩層，露營車儲物盒，戶外行山枱櫈都演變成咖啡室座位嘅一部份。星期六下午兩點幾到場，竟然唔使排隊等位。一入門口就有個咁靚嘅環境可以俾你打卡影相喇！店內有兩位小鮮肉，其中一位高大啲嘅小鮮肉好有禮貌，隻眼識笑㗎。。。幾可愛！開心果牛油果奶昔、北非蛋配酸種麵包、牛油果無花果配酸種麵包都好吸引。但我一個人根本都食唔到兩款咁多，所以同小鮮肉溝通完之後，最後決定要「軟包焦糖香蕉樹頭麵包」即係法國吐司，配搭一杯清爽嘅鳳梨冰茶。雖然呢個法國吐司唔算平，但係打卡真係好靚呀！周邊有石榴肉、無花果、藍莓，仲有啲瓜子同花瓣，真係好有少女心。隔籬枱嗰兩位少女，影相影到個伯爵茶雪糕都溶晒，都仲未影完。法國吐司個蛋香味好重，切開咗都可以睇到入面好綿密。即使唔搭配雪糕或者楓糖漿，只食蛋香味都好好食。鍾意食法國吐司嘅人，有興趣都可以過嚟打卡食好西。