La Vigne (已結業)

假期就嚟到尾聲，所以特意揀咗間冇咁近旺區，位於大角咀嘅小店La Vigne食晚餐。Dinner Set選擇幾多，仲有額外兩款廚師推介定期更新。Dinner Set包括沙律、蒜蓉多士、餐湯、餐飲同甜品，喺旺區餐廳好難搵到咁抵嘅set。沙律配搭水果，以醋調味，感覺清新。甘筍忌廉湯幾有驚喜，因為甘筍嘅甘甜味好出，但唔會有草腥味。我同朋友湯上面嘅「拉花」唔一樣，喺細節度feel到廚師嘅warmth。主菜點咗$238嘅300g西冷牛扒，呢度唔係扒房，但都用上質素頗高嘅美國Prime西冷，價錢仲十分公道。五成熟嘅西冷表面煎得微焦，帶炭香味，滲油香而唔乾身。牛扒好易切開，內裏嫰紅、多汁。伴菜亦幾有心思，薯蓉富牛油香，有少少薯粒增添口感。跟餐嘅甜品可以揀牛奶布甸或者芒果布甸，但見到menu上面嘅特色甜品，我哋忍唔住加碼。我哋好想試鹹蛋黃雪糕可惜今日未整起，退而求其次揀咗相對普通嘅Apple crumble配焦糖雪糕，但估唔到幾出色同特別。呢度嘅雪糕係自家製，焦糖雪糕食得出香濃牛油香，而且好軟滑，估唔到喺餐廳都食到高水準雪糕。Apple Crumble微暖、香脆，同雪糕好夾，絕對值得一試！