叁去壹點心粉麵飯 (已結業)

西環有三間都幾出名的點心店，今日終於試到其中一間。其實如果正式黎講，我會咁樣去形容這家食店：一間有點心賣的茶餐廳。他的點心其實款式並不算太多，我們一行三人，點了蝦餃、燒賣、鮮竹牛肉、叉燒包、蒸排骨、糯米雞、蝦腸，鮮竹卷、粉果、馬拉糕、雞絲粉卷同鳳爪同雞扎一共十二個點心，咁多樣嘢之中，我覺得粉果最好，皆因皮唔會太厚的同時又唔容易穿，同時又唔會黐實晒，等你一夾的時候就會爛開。餡料方面除咗有平日常見嘅沙葛之外，佢仲有好多材料，好味。第二好食我會揀馬拉糕，佢用嘅糖好適中，唔會太甜。排第三的我會選鮮竹卷，佢嘅鮮竹卷真係好足料，同坊間食到嗰種得舊肉嘅好大對比，呢一間好食好多。第四位我會揀蝦餃同燒賣，上枱熱辣辣，所以特別好食，不過因為前面太出色，所以搞到蝦餃燒賣排第四。