紅茶冰室

營業中

休息中

響尖東附近做嘢中間都係冇時間食嘢，所以繼續叫外賣，其中一個朋友想食啲甜嘢開胃啲嘅，所以就諗起食西多士，跟住搵到呢間紅茶冰室，見佢個位置都比較近，諗住應該送外賣嘅時間都比較快，結果都冇令人失望，嚟到啲嘢食都仲有餘溫。朋友要咗個招牌芝士流心西多士，我睇見都忍唔住食咗兩啖，佢嘅糖漿已經加咗落去個盒度，個人會比較喜歡糖漿分開自己加落去多啲，不過咁樣都冇乜嘢問題，係食到收尾覺得糖漿好似唔夠。講返個西多士裏便嘅芝士份量都好足夠，朋友食完都已經覺得好飽肚，同埋味道都覺得好好。我就叫咗個咖喱牛脷飯，牛脷嘅份量都好夠，咖喱嘅味道亦都好好，牛脷本身有煎過吓嘅，咖喱汁亦都係分開上，所以嚟到嘅時候都暖暖地，同埋食完之後大部份人都應該覺得夠飽，總括嚟講都係值得一讚嘅。