MAZ Thai & BBQ (已結業)

本身好中二食泰菜，加上天氣涼涼地，食下辣野好正。於是去左MAZ Thai & BBQ。首先整個生蠔食下，配上白酒，生蠔唔算肥，岩我口味。海水味都幾濃，配上泰式辣汁，一入口好滑同鮮甜，唔錯。之後叫左半打豬、牛、雞肉串，好入味，不過唔算太突出。重頭戲係冬蔭公加海鮮拼盤，可以一路放唔同海鮮係冬蔭公度煮，所以湯一路滾，我地又可以一路食住熱辣辣海鮮。最驚喜係有花膠，好滋潤呀！蝦同蜆非常新鮮，蝦就爽甜，蜆就肥美，至於墨魚滑就彈牙。最後放埋肉丸同金菇吸晒海鮮既甜，再飲埋足料到爆既湯，好有滿足感。由於小朋友食唔到辣野，叫左海南雞飯，足足有半隻去骨雞配上油飯，雞肉都幾嫩滑。另外加條鹽燒馬友，魚肉好滑嘟嘟，而且入味，唔使點醬都已經好鮮，阿仔自己一個食左大半條。食得泰國野點可以少左芒果沙冰，食完辣野，飲啖冰凍感直衝上腦既芒果沙冰簡直完美。