BABY K Bora Seafood (已結業)

為咗要為小姪兒購買比卡超，週一專登約同尖咀通契妹陪伴遠赴K11濕平。買完野後，小肥契哥當然係好識做地請食晚飯啦，地點就好隨意咁揀咗喺商場三樓o既「BABY K Bora Seafood」。西餐廳樓底高，面積寬廣，左方為酒吧區域，右邊則為用餐大堂。兩口子被安排入座二至四人o既厚墊梳化卡位，高高在上，而且闊落舒適。可能見門外o既彩圖餐牌及餐墊上都印有搶眼o既龍蝦，有選擇困難症o既契妹居然諗都唔洗諗，即決定點食「波士頓龍蝦二人套餐」（$638）。哥哥仔話跟餐每人其實可點餐酒一杯，但適逢西曆元宵一月十五日，佢就提議叫調酒師免費升級炮製兩杯情人雞尾酒我地嘆。草莓玫瑰園：雞尾酒混入咗Daiquiri、玫瑰露、冰沙、鮮奶、士多啤梨等，其鮮紅色o既外表可謂熱情如火，飲落卻又清涼甜美，就像是愛在冷與熱情之間，當真夠哂劇情。盤邊再以超甜o既士多啤梨玫瑰花點綴，美艷得黎極富詩意！黑松露野菌忌廉湯：以野菌打成蓉o既忌廉湯芳香輕盈。鵝肝凱撒沙律：沙律清新爽脆，配上外脆內軟嫩o既鵝肝可謂成功升呢，掂呀！芝士海鮮意大利飯：熱辣辣o既意大利飯濕潤帶甜，不過可能細佬因近期工作煩瑣引致胃部有啲不適，食落就覺得有少少溜滯。