Green Tech Cafe (已結業)

今日過西灣搵完個朋友，順道一齊食埋晚飯。我朋友係素食者嚟，所以帶咗我去依間佢成日去嘅依間Green Tech Cafe 無五辛素食餐廳。餐廳嘅晚餐都配有餐湯，而且仲可以用晚餐價加購飲品，價格都幾優惠。是日餐湯係西蘭花椰菜花湯。湯嘅味道好好，而且仲飲到粒粒西蘭花椰菜花，令湯有點口感上嘅層次。主食方面我同朋友分別點咗雜菌濃湯烏冬配鹵水豆腐同埋泡菜肉醬意粉。先講雜菌濃湯烏冬配鹵水豆腐，湯嘅雜菌味都真係幾濃郁，輕盈得嚟又夠飽肚，而跟烏冬配嘅鹵水豆腐，有普通滑豆腐同蜂巢豆腐兩種。豆腐好入味，尤其係蜂巢豆腐，非常之正。至於泡菜肉醬意粉，都幾驚喜嫁。意炒炒有炒過拌勻，泡菜唔算辣，稍微甜甜地。而依個意粉真係有肉醬嫁，因為用咗新豬肉肉醬，再加埋椰菜，口感相當豐富。飲品方面，我哋分別點咗紅火龍果香蕉亞麻籽燕麥奶同攻玫瑰梳打。紅火龍果香蕉亞麻籽燕麥奶係植物奶特飲嚟，因為揀咗燕麥奶，味道唔會太甜。而玫瑰梳打就非常之靚，面頭灑滿乾玫瑰花。