Just Eat (已結業)

今晚拎野過西營盤英華臺俾好友，順便依個晚飯兼聚下。朋友就問，佢屋企樓下開咗間新嘅越南菜，要唔要試下。鐘意試新野嘅我，當然無問題啦。Just Eat 店內環境舒適，員工都好友善，服務態度好好，食物嘅定價都好合理。我同好友今晚得兩個人食飯，所以都無叫特別多嘢食。泰式生菜包：肉碎係豬肉嚟嘅，調味做得好好，微辣中帶一點點檸檬汁既酸味，令人胃口大增。生菜菜都揀咗最靚嘅幾塊嚟做依度菜，而且相當乾淨。濃味牛湯浸牛肉河：想知一間越式餐廳做得好唔好，就必定要食生牛河。Just Eat嘅濃味牛湯浸牛肉河做得唔錯，牛肉夠薄，而且上到檯做係紅卜卜。湯頭牛味都好夠，而且唔好蓋過生牛肉嘅味道。燒雞撈檬：點完餐先後睇下OpenRice食評，見到有人話燒雞偏咸同太乾，起初個心都驚驚地唔好食，但一入口發覺一啲都唔似果篇食評講，燒雞一啲都唔乾，表面燒到脆哂，而肉仲係好嫩滑，而且味道剛剛好。越式凍檸茶：依個凍檸茶唔同之處，就係用咗青檸檬。好好飲。