荔香園冰室 (已結業)

嗰晚同朋友嚟到旺角嘅呢間懷舊冰室食晚餐，本身朋友一心歡喜想試佢嘅芝士流心西多士，結果係我哋落單差唔多10分鐘後先有侍應走出來講話唔好意思冇晒，由於最想食嘅嗰樣嘢冇得食當然個心係沉一沉，但侍應都好好禮貌，而且仲話免費俾我哋揀一個小食（一開始話免費之後話收返我哋西多士嗰個價但出單又係免費，唔知佢係咪內心都打緊仗呢）嘢飲方面，自從返工之後就覺得好疲乏，會更加想喺收工嘅時候飲可樂，唔知大家有冇同感呢？嗰日我就叫咗可樂，點知！可樂都冇晒，於是我就揀咗個抹茶紅豆冰，味道都唔錯嘅。雖然嗰日真係叫咩冇咩，而且等候時間係非常非常非常耐，但基於最想食嘅嘢未食到，我都係會再去幫襯。同埋環境不得不說係我鍾意嗰種懷舊風味呢。