陳儀興飯店 (崇齡街)

營業中

休息中

呢期思鄉情重，所以都係特別想食潮州菜，今晚過嚟食吓呢個潮州菜嘅老字號。呢度確實係比較傳統，個環境好似大排檔咁，啲職員都唔會特別親切友善，仲有啲惡添。但係好在啲食物都真係幾好食。坐低點少得食個滷水鵝片，鵝片都幾大塊，份量都唔錯㗎，不過個滷水汁都幾鹹，所以叫埋碗白粥一齊食就very good。另外我哋叫咗個韭菜豬紅，一上嚟個份量都係嚇死人。嚿嚿豬紅都勁大嚿，完全鋪滿咗個碗，啲豬紅都好夠鹹，不過如果可以再多少少辣味咁就完美。個底都有好多韭菜嘅，呢碗韭菜豬紅真係大件夾抵食。另外叫咗個椒鹽鱔片，第一次咁樣食鱔片，佢切到細細舊冇乜骨係唔錯㗎。啲炸粉都唔會太厚，但係如果椒鹽可以多小小，味道再濃啲咁就好啦。跟住仲叫咗個鐵板通菜，普通菜就好夠鹹都好夠味，鐵板上，吱吱都幾有特色㗎。甜品方面，叫咗個脆皮落湯錢，不過呢一個甜品真係要趁熱食，如果叫嘅話一定要食飽晒先好叫或者記得要叫職員後上。如果唔係就食唔到佢軟軟糯糯嘅口感只係硬掘掘嘅一舊粉團。