GRIND SIZE

營業中

休息中

每次經過都被佢個「窮」字吸引到視線，不其然就入去嘆杯啡。餐廳裝修以灰白色為主，牆上有個相當吸睛嘅世界地圖。上一層第一眼便見到「見字飲啡」四個大字。樓上有榻榻米同梳化位，地方更闊落感覺更自成一角。Chill住嘆Flat White等開飯感覺特別正。另外，見到佢哋有好多好吸引既飲品，個人心水：奶蓋蔗汁烏龍茶、芒果百香果梳打、桂花拿鐵，真係要嚟多幾次先試得哂😆本來見有餐湯/ 沙律、前菜、主菜同飲品好抵，打算叫二人晚餐。但一見到「手工龍蝦汁蟹肉貓耳朵」，又抵抗唔到龍蝦嘅誘惑。每隻貓耳朵都掛滿濃濃嘅龍蝦汁，啖啖蟹肉加埋三大隻蟹鉗，真係冇得彈。「慢煮牛面頰·港式沙嗲汁煎腸粉」用刀一切，就發現牛面頰比想像中更腍，用叉已經能輕易分開，入口即化而且軟腍入味；腸粉點埋沙嗲汁一齊食，辣辣地非常惹味。睇到個名已經覺得好有新意嘅甜品—「不是飲品·凍奶茶」。焗熱咗嘅奶茶口味心太軟，一切開內𥚃就好似熔岩咁擁出嚟。配埋雪糕一齊食，真係超大滿足。