老掌櫃東北菜館 (已搬遷) 新店位置

一行五人，一心來試食片皮鴨，叫了一隻，上檯有兩大碟已經片好的鴨肉，看到賣相，個心已經冷咗一截，試一口，肉多過皮，皮也不脆，與平時食開的北京填鴨仍有一大段距離，感覺上，與我們去買隻燒鴨回家起肉分別不大，老實講，都幾失望。另外叫了羊肉餡餅，家常餅，豆沙鍋餅，幾款餅類的皮都很韌，也許，是我個人口味問題，不喜歡食太韌的東西。(講到餡餅，餅類，我還是覺得馬X莊的餡餅做得較出色。)至於雞絲粉皮，這兒做得不錯，粉皮不會痴埋一嚿，個醬的味道，濕度都掌握得唔錯。香樁炒蛋，賣相唔靚，但味道都唔錯。拔絲蘋果，備有一大碗水一起上檯，侍應提示先浸水拉絲更好，我們聽指示來試後，拉絲很長，但好痴牙，唔識欣賞。每人的口味都有所不同，但對我個人而言，試過一次便夠了。