夢 (已結業)

難得下午放假，同朋友去食懷石料理。中環區一向多高質餐廳，今日食呢間真係視覺及味蕾享受！由於廚師發板所以每道菜都期待又驚喜。一開始店員叫我哋可以準備手機拍片，因為呢道菜煙燻效果，好值得影低！打開盒子，一團團煙冒出來，入邊有個靚靚嘅粉紅色泡沫。泡沫係草莓味！泡沫下有白粟米甜甜地，仲有無花果。之後呢一道菜超級靚！真係估唔到可以整到咁，第一次食！暑假夏日沙灘主題，色彩繽紛。有我最鍾意食嘅日本蜜瓜、Parma ham、脆雲吞同埋紫薯果凍。呢幾樣嘢食完幾開胃！跟住嘅刺身亦都擺到好似藝術品一樣。沙灘主題配上貝殼等等裝飾。有帶子深海池魚及愛女魚。跟住到海膽殼做成碗咁，面上裝飾有啲花、海膽、西班牙紅蝦、蛋。食得出多重味道，西班牙紅蝦鮮美最突出。之後炸物及粟米湯。好似炸雲吞咁，但係入邊就係蟹肉。脆炸金目鯛，魚鱗炸到好靚。之後湯清清地幾好飲。然後店員拎出一個木盒，神秘木盒入邊有巨鋒提子、蜜瓜同脆餅奶凍。以美味水果作結。