Warren (已結業)

Warren喺OpenRice幾乎一面倒都係好評，一直都喺我bucket list上面，趁住大假期前同先生嘗嘗鮮。餐廳選址雖然唔喺鬧市之中，但更顯得清靜雅致，門面唔大，用上霓虹燈做成店名，辨識度高，門外放咗精緻嘅盆栽同枱凳，感覺舒適。店內地方亦唔算大，有一面大立體裝飾，配上鏡牆，令空間感更大。最先上枱嘅係侍應推薦嘅香煎鵝肝，擺盤相當別緻。香煎鵝肝嘅面頭係烤過嘅香脆薄多士，透住淡淡嘅牛油香，然後係清新蘋果醬。鵝肝煎得剛剛好，油脂豐富，入口齒頰留香，配上帶有果肉嘅蘋果醬清新解膩，每一啖都係享受！藜麥沙律壓成磚狀，面頭以黑魚子點綴，倍覺矜貴，入口有絲絲蟹肉，感覺清新健康。刺身帶子十分新鮮，伴上黑魚子更添鮮味，底部係紅加侖子啫喱，味道酸酸甜甜，配上旁邊嘅沙律，非常開胃。西冷質素極高，厚切然後煎到三四成熟，色澤嫩紅但不帶一絲血水，入口鮮嫩多汁，口感軟腍，配上紅酒汁非常出色。伴碟除咗鮮蔬之外仲有薯蓉，飽腹感強。燒羊架同樣出色，燒到三四成熟，色澤粉紅，肉嫩多汁，而且一啲都唔羶，非常有驚喜！今晚嘅每一道菜都令人滿足，無論係賣相抑或係味道水準都非常高，雖然價錢唔平，但非常值得。