Fiat Caffé (已結業)

一間食肆，要俘虜到食客嘅心，關鍵在於大廚對烹調食物嘅執著同熱誠，裝修同佈置反而係其次。何解突然咁感慨呢？話說今日晏晝，同朋友出咗去尖沙咀美麗華商場行街，經過 Fiat Caffe 門口，見𥚃面人唔多，地方闊落，以車作佈置夠晒特別，加上好奇心驅使，經商議後，決定入去一試。我同朋友點咗 Pumpkin Risotto 及 Steak Sandwich 兩個 Brunch Set，餐飲嗌咗兩杯走冰嘅 Peach Tea。講賣相，南瓜意大利燴飯，金黃色嘅外表，睇頭十足；牛扒三文治上嘅太陽蛋，添咗啲黑松露醬，贏晒！但論味道，完全唔係嗰回事，失望之餘，連番嘆息 😮😧...... 燴飯上栗子嘅味道，跟即食嗰啲毫無分別，飯本身有部分未熟透，勉強合格；三文治塊牛扒無落鹽，亦食唔到黑松露本身嘅味，個雜菜沙律連黑醋汁都無一滴，兩把餐刀完全切唔開底層嗰塊包！當堂投降擰晒頭。比佢一次翻身嘅機會？相信短時間內暫時唔會住喇。