一心素食 (已結業)

唔係呢頭返工，真係好少去牛頭角同觀塘之間呢個位，今日黎到呢度，係因為行完山想去食阿元來了，點知咁啱無開，已經好攰唔想行，一致同意過黎大大個招牌嘅一心食晚餐。餐廳有啲健康產品賣，最有興趣係淮山麵，不過佢個形態太似公仔麵，唔係我食開白色果隻。叫左三個晚餐，跟餐價錢一百上下，前菜沙律好酸，生果新鮮，羅宋湯幾濃味，湯料有紅蘿蔔同菜，有蕃茄酸味，餐包無咩特別，柚子蜜飲品夠味但細杯左少少，可能我地特別口渴。鮮茄蘆筍燴稻庭烏冬，蕃茄好多，足料，但有d up味，烏冬亦太淋，蘆筍太碎。XO醬炒飯-炒得幾乾身，個調味幾好，有蛋香，份量多。星洲素海鮮炒淮山麵，淮山麵似炒公仔麵的樣同口感，有淡淡咖哩味，素海鮮幾有趣，份量多，但較多油。甜品有千層蛋糕同芝士蛋糕，都好有水準，芝士蛋糕香濃，但硬左少少，難切開。環境似快餐店，但呢度員工好好笑容，好有禮貌，我成日出街食飯，但好少餐廳有呢種咁親切感覺，令人難忘。