大樹先生的家 (皇室堡)

營業中

休息中

大樹先生之家在台灣開業和流行之前，我都無乜聽過親子餐廳，亦未接觸過呢一類的親子餐廳。所以大樹先生之家都可以算得上是親子餐廳的元祖。這是在香港開的第二間分店。我以前未去過台灣的大樹先生之家，只係喺網上見過圖片。到實地後，見到和台灣的店相差唔遠。裝修富有色彩，吸引到小朋友。玩具的區域都好大，而且有好多唔同類型嘅嘢玩，有體力化的滑梯波波池，有啱女仔玩的煮飯仔，亦有野餐玩具，帳篷，cosplay衫等等，夠多選擇。波波池仲有職員姐姐睇住，好安全。嘢食方面，我地一行三人（兩大一小）點咗三個餐。兒童餐點咗螃蟹寶寶。是炒飯加雞扒，仲有香口小食同埋水果，好足料。大人餐我地點咗一個幾豪嘅慢煮牛柳配鵝肝。肉質好好，鵝肝亦煎得啱啱好。點套餐加埋一個湯，沙津，同埋一杯茶。另一個餐我地揀咗意大利飯，同樣是套餐。用黃咖哩來煮的意大利飯，配上海鮮，感覺好配合。小朋友梗係鐘意玩，等餐嘅時候俾佢玩下先。個餐黎咗，食完又再玩。大人就可以休息下，唔洗一食完就被個小朋友催住要走。總括黎講，呢類的親子餐廳能夠照顧到大人同小朋友的需要。一家人搵地方食飯的話，係一個唔錯嘅選擇。