緣聚鮮鍋 (已結業)

以往曾經係荃灣大鴻輝中心唱k同食過日式放題，都知呢到一向幾旺場，餐廳都算多。今次試下呢間號稱有火鍋又有自助餐嘅餐廳，連加一$200幾就食到，又真係幾吸引。今次揀咗$188任食自助餐(升級刺身)+火鍋，以呢個親民價錢而言，餐廳嘅刺身同壽司選擇比想像中豐富。刺身有三文魚、魷魚、玉子、赤蝦、帶子等，每次可以揀三款。新鮮度不俗，而且切得尚算厚身。特別推介赤蝦，有光澤又啖啖肉。壽司水準亦不過不失，值得一試。創意火鍋配料揀咗芋香鴛鴦薯同火鍋麻糬，兩款都係主打甜味嘅丸類。前者食落似有餡版芋圓；後者則夾以黑芝麻餡，同湯丸有異曲同工之妙。意外地我又幾接受到呢兩款火鍋配料。另一款驚喜火鍋配料有高湯小籠包，坊間火鍋店較少見，可惜外皮厚身咗少少。肉類主要揀咗美國穀飼肥牛同特級牛肩胛肉眼，兩款肉嘅牛味較重，脂肪比例偏多，適合一眾牛魔王。海鮮方面揀咗沙白同蠔肉，兩款肉質都偏結實，蠔肉算係幾肥美。App內選擇唔算好多，反而自助區域選擇較多，有炸物、沙律、各式火鍋配料同甜品等。炸物分別揀咗薯格、薯餅、薯條、麥樂雞同鹽酥雞，一次過滿足炸物控嘅幾個願望，如溫度上再熱啲會更好。甜品同飲品區選擇亦不少，甜品有唔同雪糕款式、奶