手卷駅

營業中

休息中

家人平時會嚟手卷駅叫外賣，我都係第一次跟過嚟堂食，三大兩小食日本野，已經諗要食幾多先會飽。餐廳位置係巴士總站隔離，如果唔係家人帶路，可能唔易發現呢間小店。入座後，我地有叫刺身丼 ，刺身，壽司，辣味冷麵，炸軟殼蟹，天婦羅蝦等等，上菜都好快手。先講下刺身丼set，入面有三文魚，甜蝦，同北寄貝，跟三件壽司，我揀咗芥辣八爪魚，虎蝦，仲有三文魚壽司，除咗跟兩件小卷之外，仲有小食芝麻八爪魚，咁嘅丼set先58蚊，抵食到不得了，大胃王嘅我，食完都飽咗一大半。壽司都叫咗好多，當中左口魚壽司，同海膽壽司，馬糞海膽真係好好食，左口魚灸燒完充滿油香，都係必食之選。三文魚刺身厚切，新鮮同抵食，連小朋友都食到停唔到口。另外讚下店員哥哥，小朋友食完生冷野係咁咳，店員哥哥好好人，即刻煲個暖水俾小朋友飲，好有人情味。佢哋而家九點半就收工，如果下次想叫外賣，可能最遲九點就要打/whatsapp俾佢地，九點半前落去拎喇。