囍慶藝廚酒家 (已結業)

媽媽特登來幫我執屋，當然要慰勞一下。去附近的酒樓搵食，呢間好抵食，有個八道鮮味海鮮餐，每位只係二百零蚊。橙汁份量亦好夠，又有果肉，幾抵飲。先來每位半隻乳鴿開開胃，幾香口入味。鮮蝦白灼，夠哂鮮甜彈牙，再配埋辣椒豉油，十分美味。鮑魚幾厚肉，真材實料。花甲份量極多，一人可以分到20隻左右。貴妃蚌都幾鮮味，粉絲又吸收哂精華，好鮮甜。清蒸海上鮮係媽媽最愛，火候剛剛好，魚肉滑一滑。龍蝦伊麵無欺場，每人有半隻龍蝦，芝士都好足料，極邪惡但真係忍唔到口。最後仲有時蔬同炒飯，食到捧住肚仔走。