園林閣咖啡室

營業中

休息中

見食評好壞參半，最好梗係親身嚟試下。由於訂得比較遲，安排坐嘅位置比較後。不過唔緊要，最梗要有得食。首先黎個沙律，選擇唔算多，但啲蔬菜都好新鮮。蟹腳啲肉質唔鹹，可口。雖然生蠔唔係即開，但肉質厚身味甜，蠔有蠔味！(如果你試過食即開生蠔，肉細又冇味，你就唔會堅持即開一定好) 蜆冇沙，啖啖肉，冷蝦夠彈性，唔錯！到咗廚房區，師父不停喺度炸天婦羅，由於人流夠，炸物夠香口，特別好食！(怕熱氣另計)天婦羅款式都算多，因為我第二輪行返去嘅時候，已經見轉咗第二輪食物。串燒有雞肉、牛肉、魚片等，大路款式。但肉味適中。片皮鴨師傅不停喺度切，成晚見佢好似切咗六、七隻鴨。熱盤都有幾多選擇，有燴牛尾、燴魚柳、時菜珊瑚蚌、青口、時菜花姿片同中式蒸魚，都幾老少咸宜。到咗甜品區，件件都係一口甜品，可以一次過試多幾款。雪糕汽水當然唔少得，實行黎過大放縱。因為有買一送一優惠只係需要280蚊，呢個價錢，如果你要求一個優雅寧靜嘅環境，我諗真係諗多咗。佢哋自助晚餐真係好熱鬧，但我見啲客人都好斯文，大家都好守規矩排隊冇打尖 (如果你食自助餐見過搶食情況你就會明) ，而啲員工都好有禮貌，不停喺度收碟同加食物，所以我個人覺得收貨！