新匯聚打冷小廚 (已結業)

今日俾老婆賣甩，係時候約下爸爸食飯。😎兩個大男人，當然去打冷小廚，食下小菜飲下啤酒就最開心。😏所以揀左係屋企附近嘅〈新匯聚打冷小廚〉來啤一啤。🍻先嚟個啱啱即炸好嘅蠔餅，炸到金黃色脆卜卜，入面有大大隻蠔，夠曬香脆。另外叫咗個蜂蜜欖角骨，大大舊，咁多件都只係$90，抵食。一字骨好厚肉，上面仲黏滿晒欖角蓉，甜甜地又啖啖肉，爽吖！有啤酒又點可以冇鹹豬手？！叫佢哋最招牌嘅酥炸德國鹹豬手是常識吧！！豬手嘅外皮整得好鬆脆酥化，肉質又唔會話勁鹹死實實，大杯酒大塊肉就是爽吧。😎估唔到食完仲有甜品送，今日係杞子桂花糕，涼涼地都幾清熱。最特別係有麒麟枝裝啤酒，兩父子係要久唔久聚一聚嘅。原來除咗小菜打冷之外仲有甜品屋，下次可以同老婆嚟食。