皇后冰室

營業中

休息中

今日去住觀塘朋友屋企攻打四方城，佢推介呢間開喺工廈內既皇后冰室，我哋買左4客下午茶餐外賣，平均$50有齊主菜及飲品，而且仲有好多選擇，真心平靚正。磨菇汁焗魚柳配珍珠飯：魚柳厚肉無雪藏味，沾滿磨菇汁，啱啱焗起，充滿芝士香氣，珍珠飯底焦香好味，粒粒分明。脆烤香草雞扒伴野菌燒汁意粉：塊雞扒成個外賣盒咁大，醃得好入味，煎到金黃色，再與意粉一齊炒，配上惹味燒汁，味道一流。香煎自家漢堡扒配黑椒汁珍珠飯：自家製漢堡扒，純手工製作，肉質嫩滑，入口相當juicy，黑椒汁調配得宜，倍添美味。意式肉醬焗意粉：意粉煮得軟硬適中，每條都掛滿蕃茄醬汁，肉醬同芝士份量都好多，加上香草，口感非常豐富。總結，茶記質素，食材卻絕不馬虎，製作用心，物超所值。