韓家韓國料理 (已結業)

今日經開觀塘好想食韓國嘢，係OpenRice度search邊度有韓國嘢食呢？見呢間韓家評語都唔錯，就盲舂舂上咗去試吓啦！一入到餐廳就被twice嘅歌吸引住, 成浸韓國味出晒黎！未開始食嘢之前老闆已經俾咗三個小食我哋試吓喇，有薯仔泡菜同埋芽菜，我自己就好鍾意泡菜個辣度，朋友唔鍾意食辣野都話個薯仔好好食！我哋首先叫咗個韓式飯團，我一直以為會係好似壽司卷咁樣嘅嘢啦，冇諗過原來係一煲上既，仲有兩隻手套，原來係俾我哋自己整飯團㗎！紫菜同埋麻油味好出，就咁食都已經好好味啦！下一道係炸雞！呢度特別嘅係炸雞會有唔同嘅味道可以選擇，我哋就揀咗最穩陣嘅芝士味，熱辣辣嚟到真係好滿足呀！食到一半個辣炒魷魚都上埋黎，呢個係我最鍾意嘅一味菜！食得出魷魚係好新鮮，好爽口，配埋呢個辣醬真係好開胃！跟住到鐵板炒五花肉，佢仲配埋生菜俾我哋包住食，佢仲好細心將啲山菜切到細細塊，一啖一舊啱晒女仔食！今次我哋真係叫咗好多嘢食，最尾一道就係我每一次食韓國嘢都一定唔會叫嘅辣豆腐海鮮湯！裏面真係好足料呀，呢排終於開始轉涼，飲半碗真係成身都䁔笠笠呀~臨走嗰陣見到佢原來仲有炸雞任食，價錢都好抵喎，下次再嚟試吓先！