巧得鍋 (已結業)

係成運工業大廈行上1樓就會見到巧得鍋。依度主打特色湯底火鍋雞煲，有好多種選擇，亦係坊間比較少見嘅味道。我哋今次叫咗青藤椒鮮辣牛雜鍋試吓，之後再加其他火鍋配料打邊爐。湯底有得自選辣度，就返個別口味。入座之後就會提供九款醬料，兩碟小食同埋青藤椒涼拌花膠。呢個配搭幾新鮮，作為開胃小食都幾好。牛涮鍋都好足料，有齊金錢肚、牛心、牛肺、牛腸等等。平時街邊牛雜得一細碗，依度可以實現牛雜自由😂 配上青滕椒湯底就辣辣地，又唔會太過油膩，煮到啲牛雜都幾入味。火鍋配料方面，掛架安格斯牛頸脊上枱好有氣勢，可以打卡。其他配菜可以揀半份雙拼，咁就算人少都可以試到唔同種類。值得一讚係餐廳抽氣做得幾好，唔會煙霧離漫，食完都唔會一陣味喺身上。另外服務都幾周到，我哋唔小心彈到湯喺身上，員工都即刻遞上濕紙巾。餐枱座位都有足夠空間，應該都幾適合一班人嚟用餐。