豪隍點心工房 (已結業)

而家市面上出現咗唔少點心專門店，全天候都有點心食，但就唔係間間都做得好，而且有啲價錢仲幾貴添。知道觀塘有一間良心高質點心店，試咗兩次，真心性價比高，味道都非常唔錯。雖然午市經常大排長龍，但係等得都好值得。燒賣蝦餃，一籠兩粒，每粒都大大粒同平時出邊見到嘅size 差得遠，餡料都非常足夠，蝦嘅份量絕對唔輕手，咬開一半見到一隻有一隻嘅蝦，足料得嚟又好食，兩粒真係唔夠喉。牛肉球、排骨、鳳爪同平時出面嘅水準差唔多，最緊要係呢到即叫即蒸，熱辣辣上枱真係唔係間間都做到。另一樣好欣賞嘅就係煎釀三寶，虎皮尖椒唔係到到都做到，而且真係有辣味，非常惹味，個豉油都食得出係特別調配，好好味。腐皮鮮蝦卷，一樣係即叫即整，咬落脆卜卜。入面有唐芹配好多蝦，正！