韓家韓國料理 (已結業)

忙到癲都總要食飯，是但執一間喺附近又未曾食過嘅，於是揀左韓家。晚市嚟講算抵，唔想單點或嗌套餐，仲可以叫炸雞放題90分鐘任食。另外最引人注目嘅就係嗰部電視機，不斷播住韓團唔同MV, 賞心悅目，韓團迷可以一邊睇一邊食，好爽。講返食咩先。一入去梗係嗌野飲。我嗌左熱紅棗蜜，朋友要蜂蜜柚子茶，兩杯都足料甜蜜養生。仲送前菜之後就食泡菜煎餅，煎餅幾脆。牛肋骨湯（跟白飯），但減肥於是走飯。湯料好多，有白蘿蔔、洋蔥、金菇、牛肋骨，紅棗仲有好多粒，所以個湯好甜，有好香嘅紅棗味。走左一個飯，加個八色拌菜牛肉石頭鍋飯過口癮 😂 減肥都要食少少飯嘅。好多料，又蛋絲又荷包蛋... 而精萃喺個韓式辣醬度，記得一定要撈落去，會香口好食啲。為了健康，要多個麻醬豆腐沙律平衡下營養維生素。好大碗，四個人都夠食。成枱韓食食飽，返歸仲要繼續做奴隸。