泰芒了 (已結業)

經過觀塘廣場地下，見到間新開張嘅飲品店 叫做泰芒了。顧名思義，佢哋就專賣泰國芒果飲品嘅店舖。我哋見到啲芒果飲品好似幾大杯幾吸引喎，就一於試下，睇下佢同佢留山啲飲品有咩分別啦。叫咗杯泰芒了，佢有大杯裝同細杯裝揀，而大杯裝個size大過個細杯裝咁多，都係加9蚊，我哋緊係叫大杯裝喇。飲品出到嚟其實有啲失望，因為個賣相同個模型都有啲差距。 杯泰芒了分咗幾層，第一層就係有芒果肉同埋啲芒果綿綿冰，而第二層就係啲忌廉加埋有柚子肉。最後一層係啲芒果汁。其實之前都喺泰國食嗰啲泰國芒果都知其實唔會話好甜而略帶酸味。呢杯正正符合我哋預期。芒果肉有少少酸唔係好甜，當然啦各人有各人嘅喜好啦，我就較鍾意食好甜嗰啲芒果多啲。芒果食落唔似新鮮切出嚟 感覺上就色澤偏黃，可能係一早切定放係度。而綿綿冰呢真係唔夠綿呀，食落似係沙冰多啲，會食到一粒粒嘅冰，有點失望。 中間個層忌廉，其實真係唔係好需要，除咗甜之外根本就唔會食落肚，同埋又加咗啲柚子肉落去，但係我一啲都食唔出。好彩成分最多嘅芒果汁呢，係幾好味幾新鮮嘅，甜度剛好，唔會令到我哋失望。總括嚟講飲品有待改善。