響 居酒屋 (已搬遷) 新店位置

觀塘抵食魚生飯～心血來潮想食日本菜，見到公司附近呢間響 居酒屋價錢合理，好評頗多，就lunch hour過咗黎試下！餐廳環境好大，環境光猛，枱與枱之間空間十足，坐得舒適！窗邊仲可以眺望街景及公園景，景觀開揚，感覺都幾chill！Lunch set 送前菜、湯、甜品及熱飲，冇加一服務費，抵食！選擇都好多，有刺身又有熟食！前菜有醬油南瓜，南瓜軟綿香甜，不過略嫌醬油太多，調味偏鹹。火炙魚生飯($98)有三文魚、油甘魚、蟹籽及鰈魚邊，每款刺身都有兩三塊，舖得滿滿。三文魚火炙後逼岀油香，鰈魚邊最肥美，入口即溶！飯後一點甜，有甜品食特別開心！呢日有布丁，口感香滑，都唔錯。