Go Inside Kitchen (已結業)

今晚係觀塘一人晚餐，揀左個有dinner set既地方。呢度係間社企餐廳，就係工廈入面，有室內位又有戶外位，仲有隻唐狗添。呢度餐牌一目了然，價錢都唔算平，勝在有齊餐湯、沙律、蒜蓉包、主菜、餐飲、甜品。我仲加$68要多4隻芝士焗蠔。餐湯係雜菜湯，蔬菜幾足料，味道酸甜開胃。蒜蓉法包熱辣辣，配餐湯夠曬正。沙律揀左巴馬火腿蜜瓜沙律配無花果黑醋。份量幾大，木瓜鮮甜。主菜揀左芝士焗西西里巴馬火腿龍利柳。配薯條。龍利柳幾大塊，配火腿加芝士所以味道就比較鹹，薯條酥脆，份量幾多。飲品揀左是日特飲柚子茶，加左一次水都仲還有味。最後係甜品，揀左朱古力布朗尼，夠曬重朱古力味。