INN - I’m Not Nothing (裕民坊YM²)

營業中

休息中

之前都食過呢一間嘅分店，覺得佢哋嘅裝飾同食物質素都相當唔錯，今日就嚟到佢呢一間位於裕民坊嘅分店，睇吓係咪都係咁高質。裕民坊呢一間分店嘅面積好大，分咗室內同半室外嘅座位，鍾意打卡嘅朋友應該超鍾意，因為佢係行英倫簡約風，成間餐廳每一個位都係打卡位。手工黑松露雲吞配野菌黑松露忌廉汁 $148之前食過意大利雲吞覺得好有特色，今日竟然喺呢一間餐廳見到，仲要係我最鍾意嘅黑松露口味。整體嚟講味道不錯，而且份量好多，野菌黑松露嘅香味同雲吞都幾夾，而且個皮唔會太厚，個人嚟講都幾鍾意。法式紅酒燴和牛面肉意大利飯 $168佢嘅和牛肉質好嫩滑，而且紅酒汁好入味，成個配搭好夾，而且擺盤超靚，打卡都非常之適合。我哋喺呢一個主菜仲加配咗套餐，有埋蕃茄忌廉湯同一杯餐飲，忌廉湯味道好濃郁，唔會好似飲緊水咁。開心果疏乎厘 $108最後以一份甜品作結，疏乎厘係啱啱整好，所以仲有暖暖地嘅感覺，唔會過甜，而且口感好鬆軟，唯獨是佢粒士多啤梨有啲酸😂，不過加埋開心果醬就可以平衡返。