Bâtard (已結業)

近期西營盤多咗好多有特色嘅餐廳，托友人嘅福，今次有機會一試打電話落booking 打到顛嘅法國菜餐廳Batard。Batard整間餐廳裝修都係行Fine Dine路線，而今次食物部分就選擇咗set+ a la carte menu上嘅Angel hair同蘋果批。首先賣相類似春卷嘅Beef tartare食落有啲似食緊拖羅蓉咁，都幾特別。之後個angel hair係好食嘅，麵質食落爽口，配埋魚子醬同松露油啖啖都有香味喺口中瀰漫。第三道嘅tomato tart亦好好食，個酥皮做得好香脆，唔會太過油。緊接住嘅scallop rouelle，個人覺得比較似墨魚滑，唔係太食得出帶子味，但整個味道係OK嘅。主菜個烤雞好入味，個皮都算幾脆，味道幾似炸子雞。最後甜品部分嘅Madeleines 外脆內軟，而蘋果批個酥皮出色，夠薄夠脆，唔錯。整體嚟講食物質素非常唔錯，只係實在好難book，想食嘅朋友要有心理準備打幾百次電話先book到。