金蘭花泰國餐廳 (已結業)

泰式料理係港人心目中份量好重，好多人特等飛去泰國食正宗泰國餐。而我係銅鑼灣搵到間泰國私房菜—金蘭花，都好正宗，而且最好成為會員，提早訂位，唔係隨時有排等。首先整個開胃既柚子沙律，微酸多汁既泰國金柚加上晶瑩剔透既蝦肉，香口腰果，既食到蝦鮮同柚甜又品味到腰果既脆，即時胃口大開。炸蝦餅既蝦肉好彈牙，蝦味都好足，用料上明顯係十足，朋友一口氣食左六小塊，不斷讚除香脆外仲好令人停唔到口。冬蔭公湯都好令人停唔到口。加左大頭蝦，香茅，唔同香料，一上台，已經控制唔到啲口水。一飲湯底好鮮甜，菇吸收左酸辣，好惹味，而湯則係偏向酸多於辣，好岩我口味，冬天飲上一碗好暖胃，夏天則幫排汗，難怪甘受歡迎。最特別係船河，其他餐廳好少見過。我地揀左牛丸，一大碗，足夠二人份量，除左牛肉味重，彈性十足既牛丸外，更有多塊肥牛，最驚喜係有炸豬皮係湯上面，脆卜卜好正。湯底係好濃郁，有啲花生味，少少似沙嗲口感，但更勝沙嗲，係泰國當地出名船河。身為健康女性， 一碟菜係走唔甩，我地叫左泰式炒椰菜苗，纖維多，火候夠，微辣得來爽脆，配上泰式炒法，好味到不得了。二人竟然掃晒全部野食。由此可知，野食係好吸引。