台食館 (福榮街)

營業中

休息中

因為想食台灣野，所以上foodpanda搵，見到呢間未食過就叫黎試下。外賣送到黎一開，份量相當公道亦算多，飯量多到細食啲既女仔可能未必自己一個食得哂既程度。但味道真係相當普通。叫既係鹽酥雞排滷肉飯便當，而野飲分別叫左凍水蜜桃紅玉同凍珍珠奶茶。便當既配料有雞扒、一啲蔬菜（豆角，西蘭花，木耳）同滷肉。木耳用左醋去調味，少少酸都幾好食，但豆角同西蘭花都係無味。而雞扒方面餐廳選用左雞胸去做，無肉汁、乾身、”鞋”口，炸皮包唔住雞扒（可能因為係外賣焗住既關係），有啲肉甚至已經脫落無左塊炸皮。而雞扒既調味粉亦落得唔夠，只係有少少香氣，但食唔到鹽酥雞扒應有既味道。飯亦偏乾身，有幾啖甚至係硬到好似飯焦咁。而滷肉醬亦欠缺油香，不黏口，有瘦肉肥肉，肉既大細唔一致，瘦肉肉質亦偏柴。最後野飲就普通，不過不失，不過值得讚既係雖然無甜度揀，但佢做到唔太甜，相信好適合平時飲野中意叫少糖既人。以上係外賣既食評，可能堂食即時整即時食會好啲，但整體食物既味道黎講我唔會想再去試多次呢間餐廳。