豪園小食 - 炸一字雞翼專門店 (已結業)

聽聞佢由美食車轉戰將軍澳Food Lane，當然第一時間約人去食下啦！佢地舖面有4個 bar 枱位，可以比大家坐低慢慢食。好彩地我地一去到就有人起身，可以坐下舒服食喇！因為想試多幾款口味，我地叫左三色雞翼 + 黃金脆脆，本來想叫埋冬蔭公，可惜當日所有慢煮系列都已經售罄。三色雞翼：分別係原味、蒜醬豉油及車打芝士味，每款有一隻，我地4個人啱啱好~ 首先食左原味先，新鮮炸起，個皮好脆，炸粉唔算厚。一咬入去已經有好多肉汁，可惜味道一般，無咩驚喜。第二款食蒜醬豉油，個汁唔算太濃，加上單單係淋上面，所以唔入味，失望。第三食埋車打芝士，芝士醬落得好重手，味道好濃郁，作為一個芝士控，佢的確係完勝。黃金脆脆炸一字雞翼：最後一款，食唔到鹹蛋黃味，上面亦見唔到有好多鹹蛋蓉，算係最失望之作。