阿土伯鹽水雞 (已結業)

聽朋友講近排香港開左唔少台式鹽水雞既餐廳，咁岩鰂魚涌見到有一間(好似係？)新開既，就儘管去試下啦。同其他地方見到既鹽水雞鋪頭一樣，一個玻璃凍櫃放哂配料出黎，既可以俾大家睇下有興趣既配料大概係點既樣又可以引起大家既食慾。通常望多兩眼，又會想加多幾樣配料。落單係自己拎紙筆圈既，有幾個set可以揀。我揀左一人餐，雞脾加雞胸跟三個配料。佢另一個選擇係三隻雞翼，感覺個份量好似會差好多咁樣？🤔配料揀左聽落好似台式d既配料甜不辣，飽肚d既薯仔同清爽岩涼拌既青瓜。雖然已經揀左薯仔，但都係加十蚊加埋麵，免得晏d肚餓又要揾野食。第一次食都係揀番原味，要個微辣就岩啦。都係將材料切細再撈，所以等左一陣就有啦。一開盒，睇落份量其實都唔少，而且雞肉既量比想像中更多。味道唔錯，汁唔算多，調味粉就唔少。微辣我覺得都唔係微，真係唔係好食得辣既人，我諗都係揀唔辣好d。雞肉既口感都唔錯，唔會好un都唔會好鞋。薯仔份量多，麵就唔算多，雖然加個大份既麵都要成十蚊。我冇喺台灣食過，所以冇得比較，都唔知正宗既味道係點。但整體味道唔錯，個醬汁幾惹味，凍凍既涼拌，天時暑熱食就岩。