韓日燒 (已結業)

第一次黎係同學帶，學生冇乜錢，一班人嘻嘻哈哈每人100蚊唔使，仲2個鐘，係好開心既回憶。多年後嘅今日中午同家人去西九龍中心，經過韓日燒，商量完決定係度食lunch。walk in都唔太使等位，㩒飛，等一陣店員就出黎帶位，態度一般但對得住價錢既。有得揀壽司放題/壽司放題+燒肉放題，揀左後者，因為記憶中燒五花腩片好正。甫進店內，環境依舊昏暗，別有情調。被安排坐係迴轉壽司旁邊卡位，攞野食好方便，有鰻魚、三文魚、螺肉、中華沙津、魷魚等等壽司。不過個人中意燒肉多啲，冇乜掂壽司。熟食有炸咖哩角、薯角、燒賣、魚蛋……泡菜、辣青瓜、辣豆芽、辣海帶……粟米湯、麵鼓湯……甜品有木瓜糖水、布甸、涼粉、雪糕……飲品有無糖奶茶、汽水、五花茶、豆漿……仲有沙律菜同橙片。燒肉方面可以燒丸、腸、豬牛雞魚肉，仲有蔬菜、菇類同粉麵等，個人最中意五花肉、鴨腎同雞翼。仲有醬料區，燒肉唔夠味適隨尊便，有韓式燒肉醬、沙嗲醬、酸汁等等，但通常我只用蒜泥、辣椒鼓油。總結，呢個價錢食到咁多種類，質素ok既野食係非常化算嘅，唔通100蚊任食和牛咩！