Cosmos Restaurant & Bar (已結業)

星期一番到香港又要工作又要拍拖食餐好，想飲兩啖，又怕伴侶詐型，就緊係要搵間有好嘢食既餐廳，自然所有事都順順利利。所以今次係尖沙咀搵到間環境氣氛好好既COSMOS一試。當晚主要係揀左兩個精選晚餐，前菜係凱撒沙律同蔬菜湯，凱撒沙律新鮮爽口，沙律醬調配得好好。而蔬菜湯足料，滿滿既番茄味。主菜係鵝肝甘荀蟹肉忌廉汁意大利飯，鵝肝油香好正，蟹肉好足，意大利飯入味有咬口。而茴香燒新西蘭羊架，擺碟有心機，主角羊架騷味唔重生熟程度啱啱好，配菜好出色，燒香而唔干又軟身。每人一杯餐飲，因為女伴唔飲酒，所以我叫咗杯long island，但我唔記得咗講我鐘意落少啲可樂，不過呢個係我問題，唔關杯嘢事，佢仍然一杯好好飲既long island。最後甜品，個餅底整得非常好，外脆內軟，加上雪糕生果，係一個好好尾聲。走個時聞到好香既魷魚味，感覺會係一個好好既伴酒菜，可惜要走了。