龍鳳祥餃子館 (已結業)

今晚有比賽，打波之前梗係要食小小野先啦。係深水埗西九龍行下，行左一圈之後覺得依間餃子店都幾岩食，一於就同朋友入黎試一試佢D水餃。 水餃店當然就以水餃為主打啦，佢就有8款既，可以5隻餃加湯面，亦可以淨十隻，而淨餃十隻可以雙拼，但就加6蚊。咁我地諗住食其他面，所以就點左淨餃10隻，分別係京蔥牛肉及肉三鮮水餃，我朋友想食辣所以就配左麻辣湯底。不過，因為我唔想食辣關係，就叫佢湯底分開上。 水餃皮薄餡靚，而我個人梗鍾意食肉三鮮，因為我鍾意韭菜，加埋蝦同豬肉係幾鮮味既，京蔥牛肉都唔錯。 除左食水餃之外，我地各人都叫左一碗面，我朋友就叫左秘製牛犇面，我就叫左羊肉汆面。兩碗面都係四十幾蚊，但份量都好多，好抵食。牛肉面牛肉都幾稔，有牛味。我碗羊肉面湯底比較濃，羊肉唔羶，而最抵讚係食完唔口乾，無味精。 各人加埋豆漿，兩個人埋單一人75蚊左右，唔使加一。食完走個陣先見到原來馬家開飯有介紹過，今次叫做誤打誤撞黎左朝聖了。