金船泰國菜

營業中

休息中

真係好易搞錯。5點半，喺隔離體育館打完波，跟手就推門去對面熟食中心。諗住係去泰x小食，啲泰侍應話要6點先坐得，於是乎話叫啲啤酒飲住坐低等，佢地就ok。離遠見到難得有椅背嘅凳就一個箭步衝埋去，但見啲侍應唔上前就覺得怪怪。安頓好，揭餐牌先發現：原來去咗對面「金船小食」。一問之後，兩家本是親戚，幾年前分了家各據一方營運。細心睇亦發現金鉛呢邊每枱有枱號牌，亦每枱有抽紙巾。食物上一眼睇到有獅蚶，至少十年冇食過，於是冒住極易通腸胃嘅風險嚟一碟。真係剛剛好灼熟（或半生熟？），仲有血色，好鮮味，至少食完幾日都冇瀉，證明都夠乾淨。餐牌寫串燒得雞、豬，實則有牛、羊。點咗雞牛豬。只少許燶邊角，豬比較鞋，雞牛都做番九龍城泰式串燒水平。芒果沙冰極濃味，落咗唔少芒果肉，嚼到輕微水果肉碎；西瓜沙冰賣相就唔多掂，搞得好唔均勻，啲冰走埋一堆，於是一邊有西瓜汁一邊得雪水味。海南雞已去骨，不過欠咗啲油香味，雞件都比較乾，有部分皮肉分離，薑蓉汁底有啲醒辣救番一把。印象中收$8x一碟，有啲唔值。炸蝦餅叫做合格，但冇種燙口感。裏面有碎蝦肉，但唔夠香。泰式炒金邊粉有五六隻鮮蝦，味酸酸甜甜，開胃嘢。走時7點半，已見成行人排哂隊近大門