咪走雞 (已結業)

咪走雞呀喂！中意食雞嘅朋友就真係唔好錯過啦！兩個人撐枱腳就最岩叫二人餐啦，一來就係唔洗諗食咩，二來係計落套餐都真係幾抵嫁！平時都無啖湯飲下，今次終於可以飲返啖燉湯啦！今日係紅蘿蔔青蘿蔔湯，非常岩晒乾燥嘅天氣飲啦！中意食咖哩嘅朋友，一定要試呢度嘅咖哩煲，因為咖哩味非常濃，絕對唔係溝水咁簡單嫁！而且都好岩拌飯，因為非常多汁。而牛腩都炆到好淋，非常易入口，而且入面都有好多料，牛腩嘅份量亦好多，真係岩晒呀！嚟得咪走雞又點可以唔食雞呢？呢個就係招牌咪走雞啦，望到都覺得吸引啦！啖啖雞肉，配合埋個汁，絕對係送飯嘅好料理，而且味道都好夠，唔洗一定要斟薑蓉。最後當然係一份甜品啦！今日嘅甜品係木槺布丁，果然有別於一般嘅中菜店，但係食落都唔差嫁，唔算好甜，反而淡淡地都幾岩做整餐飯嘅結尾。