譽小館 (已易手) 新餐廳

「唔返大陸，人生就無意義」就係因為佢呢一句話，我就跟左佢返大陸，體驗下咩係「人生意義」。本來幾個朋友約埋係上水出發。點知某條蛋散遲大到，咁唯有係彩園廣場行一陣，經過地下見到呢間餐廳，居然有得食點心，環境乾淨企理，邊食邊等起碼有位坐下嘛。一坐低，餐廳丫姐已經好好招呼，仲主動提埋我地有下午茶。原來呢到星期六日都有下午茶食，同樣32蚊已經可以任選兩款手工點心，仲唔洗收加一。而落單都係用點心紙，想食乜就晝乜。食點心點可以唔叫蝦餃同燒賣。燒賣外皮夠軟熟。肥豬肉吃落好順滑，蝦肉彈牙爽口，推薦！蝦餃晶瑩剔透，外皮厚度適中，蝦肉塞到滿一滿。仲叫左鮮蝦雲吞，山竹牛肉，鮮竹卷，叉燒腸，咸水角同糯米雞。鮮蝦雲吞38蚊有8粒，大大粒，仲要粒粒都新鮮彈牙，我係連個湯都飲埋。山竹牛肉蒸得啱啱好，口感彈牙嫩滑，加埋喼汁真係叔叔都不行了。鮮竹卷好JUICY，唔知點解只要用腐皮卷埋一齊就會覺得好好味，好神奇。叉燒腸腸粉同叉燒既比例做得好好，唔會過多又唔會過少，而且叉燒分布得好平均，好食。咸水角外皮脆卜卜，入口煙韌，充滿咸香。糯米雞我朋友食，我冇試到。見隻糯米雞咁大隻，就問朋友好唔好食。點知佢答我「呢隻糯米雞好有雞味」。