澳門翠苑餐廳

營業中

休息中

呢間餐廳食左好多年，次次兩個人去都會叫個咖哩牛腩農夫包餐慢慢嘆，一排冇去幫襯，今次一去都幾失望。講返個環境，都係一般街市熟食檔，當然唔好期待周圍好乾淨好好坐。但今次去到，執台又冇人執，到有人執台，又將台面垃圾掃落地，惡性循環，咁嘅環境只會越黎越差講返食物，其實除左咖啡牛腩農夫包餐以外，我咩都未食過。以前每次去都好滿足，咖哩好香，少少辣，牛腩又淋份量又足，一搣開個包直情係熱到辣手！麵包皮外脆內軟，點落咖哩汁到係人生一大樂事！今次再去，首先個餐已變成60蚊，不過兩個人share都算平。跟餐嘅葡式牛腩湯一如以往咁好飲，酸甜度適中，好香牛味。咖哩汁另上，唔會整淋晒個包。打開錫紙，搣開個包，依然係熱辣辣，牛腩香撲鼻，個包外脆內軟的確係一絕。可惜，敗筆在於咖哩汁，冇左以前陣咖哩香，食落好淡口，冇咩味。但個汁又唔係稀架喎，我估可能係調味唔同左？總知同以前爭好遠。其實個包嘅精粹在於個咖哩汁，希望餐廳可以改善下，令我可以重溫昔日美味。