喜來稀肉 (已結業)

先生提議晚餐食韓式燒肉，正好一解我對韓國嘅相思之苦，躊躇咗一陣食邊間好，比起任食嘅燒肉放題我更喜歡逐碟叫，一來肉嘅質素一般都比較好，二來前菜同爐邊蛋都足夠填滿半邊肚皮，又何苦辛苦自己搏命塞。一入座枱面已經準備好豐富嘅前菜、爐邊蛋同生菜，當然唔少得標準韓式燒肉用嘅肥豬肉。前菜有辣醬沙律、泡菜同醃蘿蔔，味道唔錯，美中不足嘅係泡菜係室溫嘅，如果係冰凍嘅就更適合配搭燒肉。每次必叫嘅豬護心肉，係橫膈膜同豬潤之間嘅一小塊肉，零舍矜貴，肉味濃郁鮮甜而且口感豐富，無論係就咁食抑或係包生菜都一流，而且一碟份量都幾多，多幾個人分享都冇問題。喜來烤肉作為另一道鎮店之寶，果然名不虛傳，卷成玫瑰花狀，賣相相當精緻。牛肉肉質鮮嫩，油脂分佈均勻，放上爐上輕輕一燒就食得，肉汁豐富。生菜上放上燒肉、泡菜、烤過嘅蒜片同醃洋蔥，係我最鍾意嘅組合，一啖塞哂落口，滋味無窮！爐邊蛋亦係韓燒嘅靈魂，一邊係泡菜蛋，一邊係芝士蛋，各有千秋，而且無限添加。除咗燒肉之外，當然唔少得我至愛嘅大醬湯，用石鍋上保持熱辣辣，濃郁嘅湯底配上豐富嘅材料同簡單嘅白飯，絕對令人滿足！除咗牛胸肉、豆腐、蜆同大蔥等配料，仲有足足一隻蟹喺入面，相當足料。餐廳食