大食代 (已搬遷) 新店位置

好耐冇喺奧海城食晚飯，今日經過就去左呢間試試，佢set dinner 個menu好似同之前唔同左。要了一個「沙沙雞飯套餐」，所謂「沙沙雞」，原來即係沙爹雞肉。首先，要讚呢度其中一樣服務，呢個小小、簡單嘅服務係好值得其他快餐店效法。事緣喺度買完野，要行過去第二度攞飲品，於是個餐出咗嚟放咗度等我嚟攞，一般嚟講，其他食店會就咁放喺度，但呢度佢會用個蓋蓋著食物。咁樣可以避免其他人喺度落order, 或者傾計時啲口水噴到食物上，影響食慾，特別係一啲多人嘅食店，唔蓋著食物實在令人擔心。希望其他食肆會效法啦。講返食物質素。個set dinner 好豐富，有一碗白湯、有餐飲(可選蜜糖柚子、紅棗或薑茶)，有少少薯仔沙律、有2,3隻螺仔，仲有「沙沙雞」，份量都唔少。個「沙沙雞」唔錯，不過個汁可以做得香啲啲。啲飯好似比起之前唔同咗，有少少汁，令個飯好味啲。環境也可以，適合傾計，仲有少少音樂。