新明發食家 (已結業)

聽見人哋話食物同健康有好密切嘅關係，咁再進一步，我覺得美食對心靈嘅健康有更大嘅關連。食物未必一定要貴先叫美食，平平哋，但可以令自己食得滿足嘅已經好足夠。呢次係第二次幫襯新明發，今次目標好清晰，就係要試盅頭飯同點心。章魚肉餅飯，portion唔算大，$21一盅。豉油已放枱面，可以任加。飯夠哂新鮮熱辣，加啲甜豉油，連埋肉餅一齊食，口感味道一流。再加啲我最愛嘅辣油，夠哂刺激。終於明白點解咁多人一坐低就嗌盅飯。燒賣，大大粒，只係$12碟。餡料方面，以豬肉為主，但亦有少少蝦。雖然有啲肥肉，但絕冇油膩感，反而令肉更鬆軟。口感之外，味道亦相當鮮味可口，確係令人回味。雖然呢度價錢優惠，但睇得出佢哋冇將貨就價，要低成本咁去將一啲普通嘅食物變成美食，唔係更加考功夫嗎？相比起其他以為賣平少少，食物同服務差就係應份嘅食店，呢度確係值得一讚。