摩登士丹里 (已結業)

今日同狗狗外出，烈日當空，勁口渴。沿路經過唔少外賣飲品店，間間我都有望下，只係度度都差唔多$40杯，雖然口渴，但覺得唔抵，而且亦冇邊款飲品特別吸引。直至行到呢度外面，見到豆花奶茶的宣傳，唔知點解，就好想試。之前飲過一間連鎖店的布丁奶茶，果時覺得麻麻哋，但換咗豆花，應該會同奶茶夾啲。再者，呢度大杯裝的豆花奶茶只係$27，以特色飲品嚟講，我諗都算平（我少幫襯）。豆花奶茶的奶茶好好味，奶味、茶味平衡得剛好，雖然我點咗少糖，但唔會飲到茶的苦澀味。豆花喺杯底，佢可能係盒裝豆腐花，加咗落奶茶度，令飲品冇咁單調，而且滑溜溜又唔heavy，比布丁奶茶有過之而無不及。最重要的係，飲品夠凍之餘，又唔會越飲越淡！嗯，等等，係呀，佢似冰鎮奶茶呀（雖然有冰塊）~~~行經呢度，我推薦大家可以買嚟試下。舖頭而家因為疫情唔准堂食，否則熱辣辣，買完就直接喺舖頭飲埋降溫~~ 仲有一樣要提，好多外賣飲品店的舖面都高咗一級，而呢度雖然都係一樣，不過，佢其中一邊係斜坡，方便咗用車（寵物車/嬰兒車/輪椅）的人上落，呢點值得一讚！我推住寵物車，輕易就入咗舖頭，落完單，又唔使企喺街度等，如果遲啲可以堂食，咁就冇得彈喇！